Munduko farmazia handienen hazkuntza sustatzen duen iruindarra

Espainiako presidente izan nahi zuen, baina aholkularitzak bidea aldatu zion. Edinburgon "au‑pair" izan ostean, atzerrian bizi nahi izan zuen. Beraz, Christian Salvesen‑en esperientzia bereganatu ostean, Kearny‑rekin fitxatu zuen, eta bertan ari da lanean duela hamalau urte. Egun, "Healthcare and Science" arloko arduradun globala da, munduko hamar farmazia‑enpresa handienentzat lan egiten duen firman.

Villavesak Sancho Indartsuaren etorbidera eramaten zuen. Bertara iristen zen, irribarre erraldoia aurpegian, lehengusu eta lagunekin batera arratsalde kutun batez gozatzeko prest. Autobus geltokitik metro batzuetara, korrika eta ala zihoazen kaletik. "Iritsi naiz! Zertara jolastuko gara?", agurtzen zituen Paula Bellostas‑ek. Apur bat aurrerago, gure protagonistak ondo ezagutzen zuen kontaketa entzuten zen. Bat, bi, hiru, lau, bost, sei, zazpi, zortzi, bederatzi… Eta hamar! Korrika eta presaka ahal zuen lekuan ezkutatzen zen, banku baten azpian ala horma baten atzean. Ezkutaketaz aspertzen zirenean gomarekin salto egiteko ordua zen, edo imajinazioa askatzeko unea, makil eta harriekin etxolak eraikiz. "Gauza txiki horiek grabatuta geratu zaizkit. Ikaragarri zoriontsu nintzen sinpletasunarekin", onartzen du 44 urte dituela.

Neskatxa irrikor horrek amets anbiziotsua zeukan: herrialdeko presidente izatea. Ez zuen betetzea lortu, baina ez zitzaion gehiegi inporta. Ziur zegoen munduan "gauza zoragarri" mordoa zain zeuzkala. Eta hala izan zen.

Zientzietan ona zen, baina letren munduak debozioa sorrarazten zion. Horra hor betiko dilema: burua ala bihotza?, arrazoia ala grina? Beti pentsatu izan da zenbakien arloak aukera profesional gehiago eskaintzen dituela, beraz, helduen aholkuei jarraituz, horixe hautatu zuen. Bere denbora librean, ordea, bere irudimen guztia poesia eta kondairei eskaintzen zien. Presidente bilakatzeko ametsa atzean geratu zenean, atentzioa deitzen zioten beste lanbideak agertu ziren: medikuntza, arkitektura… "Azkenean irabazi behar izan ez zuenak irabazi zuen: ingeniaritza industriala", adierazten du algara artean.

BURBUILATIK IRTETEA

Nafarroako Unibertsitate Publikora (UPNA) iristean, bere bizitza akademikoa guztiz alderantzikatu zen. "Klaseko bizkorrena izatetik dena suspenditzera pasa nintzen karrerako lehen urtean. Ingeniari ikaragarri txarra nintzela sentitzen nuen, baina lubakietan egoteak onura egin zidan", baieztatzen du. Urte haietatik maitasun bereziarekin oroitzen da unibertsitate karpetaz. Izan ere, behin antolaketan parte hartu zuen eta, ekitaldian zehar, Tahúres Zurdos talde nafarrak haien abesti ezagunenetako bat, "Llueve", abestu zuen: "Justu une hartan zirimiria hasi zen. Momentu magikoa izan zen".

Karrera atera bitartean, atzerrira joatea erabaki zuen. Giroz aldatu nahi zuen. Beraz Edinburgora joan zen, eta aldi berean au pair lanak egin zituen hiru urteko neska bat zaintzen. "Sekula ez nintzen etxetik atera edo amaren gonatik aldendu. Gurasoak harritu egin ziren", oroitzen da.

Bidaia hark dena aldatu zuen. Hain da hala, dudarik gabe onartzen duela une horretatik aurrera bere burua aurkitu zuela. "Iruñeko burbuilatik irten nintzen. Konturatu nintzen gehiago bidaiatu nahi nuela", adierazten du, eta jarraituan azpimarratzen du aurrerago Estatu Batuetan Erasmusaz gozatu ahal izan zuela.

PERTSONEN OSASUNEAN ERAGINA IZATEA

Lan munduarekin izandako lehen kontaktua Erresuma Batuan izan zen. Graduate Management trainee gisa sartu zen Christian Salvesen enpresan, logistikan espezializatua. Bat-batean hainbat alorretako esperientzia bereganatu zuen: garraioaren antolaketa, negozioaren garapena… "Ingelesak oso basatiak dira, berdin zaie titulu edo adina. Burua ondo jarrita daukazula ikusi ezkero, segituan ematen dizute lana", erreparatzen du, hilabete batzuetan zehar biltegi bateko antolaketa burutu zuela azaldu ostean, non ehundaka pertsona izan zituen bere kargu.

Bi urteren ostean, Commercial Project manager postua lortu zuen Estrategia departamentuan. Hor konturatu zen enpresen munduak zenbat erakartzen zuen. Horregatik erabaki zuen formakuntza osatzea Business Administration Masterrarekin (MBA), Cranfield School of Management-en, eta ostean aholkularitza arloan probatzea erabaki zuen.

Kearny enpresa britainiarrak ongietorri beroa egin zion gure protagonistari. Hamalau urte pasa dira eta hemen jarraitzen dut, Londresen, aholkulari lanetan. Eta maiteminduta nago", dio alai. Oraindik oroitzen da bere kargu izandako lehen proiektuaz, farmazia eta osasun‑arloetan: "Harritu egin ninduen gure aholkulari lanak pertsonengan eragina izan zitekeela ikusteak".

Paula zuzenean dabil lanean farmazia industriako enpresekin, horien hazkuntza sustatzeko. Non inbertitu behar du negozio batek? Nola kokatzen dira lehiakideak? Nola lor daiteke bezeroek bizitza‑kalitatea izatea? Nola barneratu daiteke teknologia medikuntzan? Galdera guzti horietan, gure protagonista berebizikoa da.

Aurrerago, Kearneyk enpresaren Europako taldearen arduradun gisa aritzeko aukera eskaini zion, Healthcare and Science arloan. Baina pasa den maiatzetik aurrera erantzukizun gehiago dauzka. "Ekialde Ertaina, Estatu Batuak… Orain mundu mailan arduraduna naiz", dio hasperen eginez, 400 langile eta 30 kide dauzkan eta bere zerbitzuak munduko hamar farmazia‑enpresei eskaintzen dizkien enpresa batean duen paperarekin pozik.

"KOMUNITATE" SENTSAZIOA

Baina Paularen "lankidetza espiritua" urrutiago iristen da. Izan ere, lehengo urtean emakumeen osasuna "birdiseinatzen" laguntzeko plataforma sortu zuen. "Sektorea gutaz ahazten da. Industriak ez du inbertitzen obulutegi polikistikoak edo endometriosia bezalako gaixotasunetan inbertitzen. Inbertsioa ez da beharretara iristen", adierazten du, bere ekimenak jada 350 enpresen babesa daukala zehaztuz.

Justu arazo honi buruz aritzen ginela, burutxo txiki bat agertzen da ordenagailuaren pantailan, bideodeia moztuz. "Hello!", dio. Lucía deitzen da eta hiru urte ditu. Amak samurtasunez begiratzen du: "Alabarekin nik haurtzaroan bizitako komunitate sentsazio hori birsortzen saiatzen naiz. Londreseko gizartea oso indibidualista da".

Baina, familiaren eta lagunen mira izateaz gain, Paulak Beatrizeko garrote famatuen mira ere badu, eta bereziki gozoki dendena. "Ikusi dezakezunez, urdailak gidatzen du nire bizitza!", amaitzen du alaba besarkatu bitartean, eta, nostalgiarekin, Iruñeara egingo duen hurrengo bisita imajinatzen du.

Elkarrizketa hau Nafarroako Gobernuaren NEXT Estrategiaren parte da.