Visitación Viñes, San Cristobal de la Lagunan (Tenerife) irakasten emandako bizitza
21/07/2022
Visitación Viñes Ibarrola Iruñean jaio zen 1894ko uztailaren 3an, eta zazpi anai-arrebetatik zaharrena izan zen. Bere haurtzaroko lehen espazioak bere jaioterriko Kale Nagusian, San Lorentzo parrokian, "Bosquecillo" kalean eta Takonera lorategietan daude, besteak beste.
Ama eta izebaren eskutik, giro kultural batean bizi izan zen Visitación, eta horrek bere ibilbide profesional osoa markatu eta ikasteko nahia piztu zion. Izan ere, ama eta izeba andereñoak ziren eta etxean eskola pribatu bat ezarri zuten.
Giro kulturala aitaren, José Viñes Belloren, aldetik ere osatzen zen. Lehen mailako ofiziala izan zen Nafarroako Foru Diputazioan, eta Iruñeko lehen gida turistikoa sortu zuen: Guía del viajero, descripción de sus monumentos y fiestas, Pamplona 1923.
Bere osaba zaharra, Benito Viñes, meteorologo espainiarra zen eta zikloiak detektatzeko aparatuak asmatu zituen.
Familia honekin ez da harritzekoa Visitacionek Magisteritza Madrilen, Irakasleen Goi Eskolan, ikastea erabaki izana. Bere lanbidearekin, irakaskuntzarekin, konprometitutako emakumearen adibidea izan zen, bere ibilbide profesionala bere lurraldetik kanpo garatzera eraman zuena.
40 urteko ibilbide profesionala Tenerifen
Madrilen lortutako goi-mailako ikasketek Eskola Normalak izeneko zentroan katedra lortzeko ahalmena eman zioten. Lehenik Murtzian lan egin zuen eta gero Tenerifeko San Cristobal de la Lagunan, Kanariar Uharteetako hiri unibertsitario bakarrean, non berrogei urtez jardun zen.
Irakaskuntza Erakunde Librearen korronteetan hezia eta Montessoriren jarraibideen jarraitzailea, Visitacion prestakuntza handiagatik nabarmendu zen irakaskuntzan.
Elias Serra Ráfolsekin ezkondu zen, Kanarietako Ikasketen Institutuaren sortzailea eta Kanariar Uharteetako lehen historialari zientifikoa.
Visitación 1992an hil zen, 98 urte zituela, San Cristobal de la Lagunan, jaio zen lurraldetik urrun. Ez zituen bere ezagutzak liburuetan idatzi, baina bai gutunetan eta testamentu berezi batetan, non esaldi txiki bat idatzi zuen bere azken borondateetan: “Nafarroakoa”. Nafarroatik urrun bizi izan arren, sorlekua ez zuen inoiz faltan botatzen utzi.